Orta məktəbdə oxuyanda ədəbiyyat, riyaziyyat, biologiya fənnini çox sevirdim. Biologiyadan olimpiadanın respublika turunda iştirak etmək hüququ qazanmışdım. Ali təhsil aldığım illərdə də fakültə və institutun ictimai həyatında fəal iştirak etmiş, Tələbə Elmi Cəmiyyətinin üzvü olmuş, dəfələrlə müxtəlif mövzularla çıxışlar etmiş, riyaziyyatın tədrisi metodikasına aid məqalələrim institut qəzetində dərc olunmuş, 1977-ci ildə respublika Tələbə elmi konfransında məruzə etmiş və mükafatlandırılmışam. 1978-ci ildən rayonda riyaziyyat müəllimi kimi fəaliyyətə başlamışam.
1981, 1983-cü illərdə istehsalatdan ayrılmaqla riyaziyyatın tədrisi metodikası, riyaziyyatın ibtidai kursunun tədrisi metodikası və habelə pedaqogikanın tarixi və nəzəriyyəsi ixtisasları üzrə aspiranturaya dəvət olunmuşdum. Təəssüf ki, ailə vəziyyəti ilə əlaqədar olaraq təhsilimi davam etdirə bilmədim. İşləməyə başladığım ilk gündən riyaziyyat müəllimi kimi hörmət qazanmağa çalışmışam, 16 il əvvəl rayonda ali kateqoriyalı müəllim adına layiq görülən ilk üç müəllimdən biri olmuşam. Şagirdlərim dəfələrlə riyaziyyat fənni üzrə olimpiadanın rayon turunun qalıbı olmuş, zona, respublika turunda iştirak etmişlər, ali məktəblərə qəbul imtahanlarında həmişə uğurlu nəticələr qazanmışlar. Şagirdlərimdən bir çoxu o dövrdə Gəncə Texnologiya İnstitutu, Azərbaycan Neft və Kimya İnstitutunun Zaqatalada keçirdiyi riyaziyyat fənni üzrə zona olimpiadalarının qalibləri sırasında olmuşlar.
2007-ci ildə bir nəfər şagirdim rayonda ilk dəfə olaraq İnformatika və hesablama texnikasının əsasları fənni üzrə olimpiadanın respublika turunun qaliblərindən olmuşdur (o il ilk dəfə idi ki rayon məktəbinin şagirdi informatikadan olimpiadanın respublika turunda iştirak edirdi)
Hər şagird bir dünyadır. Uşaqlarla işləməkdən xoşum gəlir. Dərslərimi müasir təlim metodlarından istifadə edərək qurmağa, şagirdlərlə düzgün, düşünülmüş əməkdaşlıq etməyə səy göstərirəm. İnsanların çoxu, xüsusilə gənclər nəsihəti xoşlamır, onlara sözlə, töhmətlə təsir etmə cəhdlərimiz əksər hallarda boşa çıxır. Gənclərə özünütəhlil duyğusu aşılamağa, özünü kənardan müşahidəetmə vərdişi yaratmağa çalışıram. İnsanın özünü kənardan müşahidə edə bilməsi, ikinci "mən”i görməyi bacarması onun təkcə məktəbdə, ailədə deyil, cəmiyyətdə də mövqeyinə ilıq bir aydınlıq, şərəfli bir dürüstlük gətirir. Riyaziyyat müəllimi işlədiyim müddətdə müxtəlif tədbirlərdə dəfələrlə "Riyaziyyatın tıdrisi zamanı qarşıya çıxan bəzi çətinliklər və onların aradan qaldırılması yolları” və s. mövzularda məruzələr etmişəm.
On beş il bundan əvvəl riyaziyyatdan testlər əldə etmək bir qədər çətin idi. 1994/95-ci dərs ilində orta məktəb şagirdlərinin testlərlə yaxından tanış olması üçün testləri siniflər üzrə qruplaşdırmış və şəxsi hesabıma məcmuə şəklində hazırlamışdım. Bu məcmuələrdən bir neçə məktəbin şagirdləri istifadə etmişdilər. Riyaziyyatın dərinləşmiş proqramla tədris olunduğu XI sinif üçün azərbaycan dilində dərslik olmadığından Vilenkin.V.A. və b. müəlliflərin hazırladığı "Alqebra i naçala analiza” dərsliyinin bir neçə fəslini azərbaycan dilinə tərcümə etmişdim, tərcümə rayon metodik mərkəzi (riyaziyyatçı E. Vəliyev) tərəfindən yoxlanılmış və bəyənilmiş, makinada çap edərək kitabça şəklində hazırlamışdım. Şəhər 1 saylı orta məktəbdə, Zaqatala Politexnik Texnikumunda riyaziyyat fənni ilə yanaşı İnformatika və Hesablama Texnikasının Əsasları fənnini də tədris etmiş, "İnformatika və Hesablama Texnikasının Əsasları fənninin tədrisi zamanı qarşıya çıxan bəzi çətinliklər və onların aradan qaldırılması yolları” haqqında dəfələrlə məruzələr etmiş, maraq kurslarından istifadə etməklə şagirdlərə fənni dərindən öyrətməyə səy göstərmişəm.
İlk dəfə 1993-cü ildə şəhər 1 saylı orta məktəbdə apardığım maraq kurslarında şagirdlərə kompüterlər haqqında bəzi nəzəri biliklər (Qbasic) vermiş, praktiki məşğələlərdə şəxsi kompüterlərimizdən istifadə edərək açıq dərslər keçirmişik. Bu iş uzun illər davam etmişdir. 1993-cü ildən şəhər 1 saylı orta məktəbində, sonra isə Humanitar fənlər gimnaziyasında riyaziyyat-informatika müəllimi işləməklə bərabər Zaqatala Kompüter Mərkəzində də müəllim kimi fəaliyyətə başladım.
2001-ci ildən Bakı Elmi-Tədris Mərkəzinin Zaqatala filialında, 2007-cı ildən isə Zaqatala Tədris Mərkəzində direktor müavini və müəllim kimi fəaliyyət göstərir, müxtəlif kursların keçirilməsində iştirak edirəm. BETM-in Zaqatala filialında, sonra isə ZTM-də işləməyimin rayonumuzun digər tədris ocaqları, orta məktəbləri ilə daha sıx işbirliyi yaratmağımıza və müxtəlif tədbirlərin keçirilməsinə çox böyük köməyi, dəstəyi olmuşdur. İKT-nin müxtəlif istiqamətlərində (Corel-Draw, Adobe Photoshop, MS Office paketi, Visual Basic, HTML ,…) keçirdiyimiz kurslar regionda yüksək qiymətləndirilir. Kompüter kurslarımızı bitirənlər rayonumuzda, Bakıda, Rusiyanın bəzi şəhərlərində işlədikləri müəssisələrdə bacarıqlı mütəxəssis kimi hörmət qazanmaqla bizə başucalığı gətirirlər, onların haqqında eşitdiyimiz xoş sözlər bizi qürurlandırır. Müdavimlərimizdən kompüter müəllimi işləyənlər az deyil. Məlum olduğu kimi gənclərin asudə vaxtının səmərəli təşkili günümüzün əsas məsələlərindın birinə çevrilmişdir. Gənclərin maraq dairələrinə daxil olan xüsusi klubların yaradılması (conversation club, elektronika ilə maraqlanalar klubu və s.), dərslərin, yarışların, … hazırlanması və həyata keçirilməsi və s. istiqamətdə müxtəlif işlər görməyə çalışırıq. Müxtəlif mövzularda diskussiya, müzakirə saatları keçirir, aidiyyəti olan hər kəsə, xüsusilə cavanlara İnternetin ancaq əyləncə vasitəsi olmadığını anlatmağa səy göstəririk.
Rayon əhalisinin, xüsusilə gənclərin, məktəblilərin İnformasiya Texnologiyaları ilə müntəzəm olaraq tanış olması, onların maraqlarına müvafiq müxtəlif kompüter proqramları və s. öyrənməsi, web-saytların yaradılması, müxtəlif fənlərin tədrisində kompüterlərdən istifadə edilməsi, ingilis dilini müəyyən səviyyədə öyrənmələrinə kömək etməyə çalışırıq. Bu işə rayonumuzda olan Sülh korpusu (PC Azerbaijan) könüllülərini də cəlb edirik, onların gənclərlə məşğələlər keçirməsi üçün müəssisəmizə verilən yerdən otaq ayırmışıq. Könüllülərlə birgə 350-400 sayda ingilis dilində bədii ədəbiyyatdan və kompüterə aid kitablardan ibarət kitabxana yaratmışıq. Kitabxanadan müxtəlif məktəblərin müəllimləri, şagirdləri istifadə edir. Bir neçə otağımız, balaca bir "kompüter dünyamız” var. Məktəblilər, müəllimlər, həkimlər, iş adamları,... İT texnologiyaları ilə bağlı müxtəlif suallarla bizə müraciət edirlər. Burada həm müəssisələrin, məktəblərin, həm də ayrı-ayrı istifadəçilərin kompüterləri təmir edilir, müraciət edənlərə kompüterlə iş prosesində əmələ gələn problemlərin aradan qaldırılması üçün məsləhətlər verilir.
2004-cü ildə "İT maqazine” jurnalının VII sayında Zaqatala Kompüter Mərkəzinin fəaliyyəti haqqında iki səhifəlik məqalə çap olıunmuşdu. 2005-ci ildə Biznes Tədris Mərkəzinin Almaniya Xalq Universitetləri Birliyinin Beynəlxalq Əməkdaşlıq İnstitutu ilə birgə təşkil etdiyi "Sahibkarlığın əsasları” və "Layihələrin idarə edilməsi” kurslarını fərqlənmə ilə başa vurmuşuq.
2005-ci ildəTəhsil Nazirliyi və Bakı Elmi Tədris Mərkəzinin Bakıda 300 müəllim üçün keçirdiyi ECDL "Avropa səviyyəli kompüter istifadəçisi" kurslarında təlimçi işləyən dörd müəllimdən biri olmuşam.
2006-cı ildə Almaniya Xalq Universitetləri Birliyinin Beynəlxalq Əm əkdaşlıq İnstitutu (IIZ/DVV) tərəfindən "Cənubi Qafqazda Yaşlıların təhsili” layihəsi çərçivəsində təşkil olunmuş "Təlımçilərin təlimi” kursunu keçmişəm, həm də "Menecment/Supervayzerlik bacarıqları” tədris kursunu bitirmişəm. 2007-ci ilin avqust ayında Rayon Təhsil şöbəsi tərəfindən Bakıya ezam olunmuş, ATƏT-in dəstəyi ilə "Davamlı inkişaf uğrunda” Cəmiyyəti "Yaşıl Paket” tədris komplektinin Azərbaycan təhsil sisteminə tətbiqini sürətləndirmək məqsədi ilə Nabranda keçirilmiş treninqdə (yay məktəbində) iştirak etdim və çox böyük təəssüratla rayona qayıtdım. İlk növbədə Rayon Təhsil Şöbəsi Metodik mərkəzin direktorunu, avqust bölmə iclaslarında isə müxtəlif fənn müəllimlərini bu tədris komplekti ilə tanış etdim. Dərs ilinin əvvəlindən məktəbimizin coğrafiya, biologiya, fizika, təbiətşünaslıq, informatika, ingilis dili və s. müəllimlərini vəsaitlə, disklərdəki materiallarla tanış etməyə başladım. Sülh korpusunun könüllüləri də bu materiallardan çox faydalandılar, çünki ingilis versiyasından istifadə etməklə xüsusilə aşağı siniflərdə dərsləri əyani, interaktiv keçmək çox maraqlı alınırdı. Müəllimlər disklərdəki mövzulardan vaxtaşırı istifadə edirlər, şagirdlər də fərdi şəkildə istifadə etməklə həm faydalı, maraqlı informasiya alır, həm də testlərin köməyi ilə biliklərini yoxlayırlar. Müraciət edən müəllimlərə, şagirdlərə disklərin surətini çıxararaq təqdim edirik. Bu mövzularla əlaqəli açıq dərslər keçirmişik. Gənc nəslin ekoloji maarifləndirilməsi məqsədi ilə, ətraf mühitin qorunması, təmiz saxlanması, suya qənaət və s. haqqında vaxtaşırı söhbətlər keçirir, şagirdlərə tövsiyyə edirik ki, bu informasiyanı başqalarına da ötürsünlər.
Şagirdlərimin hamısı informatika fənnini çox sevir, həvəslə oxuyurlar, praktik məşğələlərdə fəallıq göstərirlər, bəziləri mütəmadi olaraq müxtəlif müsabiqələrdə iştirak edir. Həmişə elə şagirdlər olur ki, içindən gələn istəklə bu fənni dərindən öyrənməyə çalışırlar. Onlarla təmənnasız olaraq dərsdənkənar vaxtlarda məşğul oluram. Hər il bir neçə nəfər məzunumuz informatika müəllimi, kompüter mütəxəssisi olmaq üçün təhsilini davam etdirir. Məktəblərimizdə kişi müəllimlərinin azalması həmişə narahatlıq doğururdu. İnformatika müəllimi olmaq istəyənlərin arasında oğlanların sayının ildən-ilə artması bizi sevindirir.
Bir neçə ildir ki, gimnaziyada rəsmi olaraq həftədə iki gün elan edilsə də dörd gün məşğələlər keçirirəm, müəllimlərin kompüter savadının artırılması üçün hər cür şərait yaradılır. Müəllimlərə elektron dərsliklərdən istifadədə, layihələr metodundan istifadə edərək açıq dərslər keçirməkdə köməklik etməyə çalışıram, gimnaziyada müxtəlif tədbirlərdə (məsələn Xocalı soyqırımı günü, respublikada ilk mexanizator qadın-həmyerlimiz S. Qaziyevanın anım günündə və s.) hazırladığımız təqdimatlardan, disklərdən istifadə edir, film nümayiş etdirərək tədbirlərin daha maraqlı keçməsinə nail oluruq. Keçən dərs ilindən artıq müxtəlif fənn müəllimləri mənə yardımçı olur, özləri həmkarlarına köməklik göstərirlər. Məktəbimiz kompüterlə təmin olunan gündən indiyə qədər I sinifdən XI sinif şagirdləri də daxil olmaqla hamı asüdə vaxtlarında, böyük tənəffüsdə, dərsdən sonra növbə ilə kompüterlə işləmə bacarıqlarına yiyələnirlər.
Şagirdlər kompüterdə işləməyi çox sevirlər
Bir neçə şagirddən təşkil olunmuş yardımçı qrup kompüterlərin sazlanması, virusdan təmizlənməsi, şagirdləri öyrətməkdə və s. işlərin görülməsində mənə həmişə kömək edirlər. Hər il yardımçı qrupun rəhbəri 1-2 nəfər XI sinif şagirdinə müxtəlif proqramlarla işləməyi, kompüterə ƏS yazmağı və s. işləri öyrədir. Bu uşaqlar məktəbi qurtardıqdan sonra yaşadıqları Car, Ələsgərli və s. kimi ucqar kəndlərdə kiçik mütəxəssis kimi işə başlayırlar. Biz inanırıq ki, onlar zaman-zaman bacarıqlarını artıraraq yaxşı mütəxəssislər olacaqlar.
Artıq 2-ci ildir ki, şagirdlərimiz marağına, bacarığına görə seçilib müxtəlif qruplarda birləşir və bəzi işləri görməyə çalışırlar. Məsələn, təlimdə qazandıqları uğurları, asudə vaxtın təşkilini əks etdirmək üçün vaxtaşırı bülleten hazırlayırlar. Özləri məqalələr yazır, kompüterdə yığır, formatlaşdırır, şəkillər çəkirlər. Dizayn, çap işlərində Zaqatala Tədris Mərkəzinin köməyindən istifadə edirlər. Bülletenlər təkcə gimnaziyanın deyil, başqa məktəblərin də şagirdlərinin fəaliyyətini əks etdirir.
Həyati bacarıqlara əsaslanan təhsil kitabları çox xoşumuza gəlir. Üçüncü ildir ki, maraq kursu xətti ilə cədvələ salınmasa da, lazımlı olduğu üçün bir qrup könüllü yuxarı sinif şagirdi ilə həftədə bir dəfə məşğələ keçirirəm.
2008-ci ildə "Yaşıl həftə" ümumrespublika müsabiqəsində II yeri qazandım. Həmin il "Zaqatala qoruğu" adlı 25 səhifəlik broşurum çap olundu.
2008-ci ildə bir nəfər şagirdim Beynəlxalq Ekologiya olimpiadasının iştirakçısı olmaq hüququ qazanmışdır.
2009-cu ildə 3 nəfər şagirdimin hər biri "Gənc kompüter istedadı" müsabiqəsində III yer tutdu. Onlardan biri əlavə olaraq "Ən gənc iştirakçı" nominasiyası ilə mükafatlandırıldı.
2010-cu ildə Avropa İnnovativ Müəllimlər müsabiqəsinin Azərbaycan mərhələsində III yeri qazandım.
2010-cu il bir nəfər şagirdimlə İREX (Beynəlxalq Tədqiqatlar və Mübadilələr Şurası) təşkilatının keçirdiyi müsabiqədə I yeri qazandıq.
2010-cu ildə "Elektron təhsil" müsabiqəsində III yeri qazandım.
Şagirdlərimdən riyaziyyat-informatika müəllimi, kompüter üzrə mütəxəssis işləyən, bu istiqamətdə təhsil alan az deyil. Bir nəfər şagirdim - Ağalayeva Gülnar -- Prezident təqaüdçüsü --Qafqaz Universitetinin "Kompüter mühəndisliyi" fakültəsində təhsil alır.
2010-cu il 5-7 iyul tarixində Qəbələ rayonunda Ekologiya və Təbii Sərvətlər Nazirliyi və BMT-nin Ətraf Mühit Proqramının birgə təşkilatçılığı ilə Biomüxtəliflik üzrə BMT-nmin baş Assambleyasının növbəti sessiyasına hazırlıq məqsədi ilə "Bioloji müxtəliflik və minilliyin inkişaf məqsədlərinə nail olunması" mövzusunda Beynəlxalq konfrans keçirildi. 7 iyulda Biomüxtəliflik üzrə Avropa regionu nazirlərinin görüşündə nümayəndə kimi mən də iştirak etdim və təşkil edilmiş Beynəlxalq sərgidə "Təbiət məharətlə yaradılmış həyat simfoniyasıdır" layihəsi əsasında hazırladığımız işlər (təqdimatlar, şəkillər, filmlər,...) çox böyük marağa səbəb oldu və yüksək qiymətləndirildi.
2007/2008-ci dərs ilində rayonumuzun beş nəfər müəllimi respublika Prezidentinin sərəncamı ilə keçirilən "Ən yaxşı müəllim” müsabiqəsinə qoşuldu. Müsabiqəyə qoşulan 5 müəllimdən hamımızın qaliblər sırasında olması, rayonumuzun iki məktəbinin "Ən yaxşı məktəb” müsabiqəsinin qalibi olması ilə Zaqatala Təhsil sistemi bu müsabiqədə birincilər sırasında idi. Keçən dərs ilində də bir müəllimimiz və bir məktəb müsabiqənin qalibi oldu.
Son illərdə iştirak etdiyim respublika səviyyəsində keçirilən müxtəlif layihələr təkcə təlimlə bağlı olmamışdır. 2004-2006-cı illərdə Word Hope təşkilatının Azərbaycanda keçirdiyi bəzi layihələrin Zaqatalada da həyata keçirilməsində əlaqələndirici olmuşam. Bu layihələrin həyata keçirilməsi ilə:
-- 2004-cü ildə Zaqatala internat məktəbinin 256 nəfər şagirdinin hər birinə orta hesabla 50-70 manat həcmində maddi yardım edilmişdir.
-- "Eye Projects" layihəsi ilə Car kəndində imkansız ailədən olan iki yeniyetmənin gözlərindəki çəplik əməliyyat nəticəsində aradan qaldırılmış, bir il həmin uşaqlar Bakıya gedib-gəlməklə həkim nəzarəti altında olmuşlar. Mənə elə gəlir ki bu mənim həyatımda qazandığım ən böyük uğurdur. O uşaqların xöşbəxt gülüşlərini heç vaxt unutmayacağam.
-- Gözlərində bəzi problemlər olan 17 nəfər uşağın da gözü Bakıda müalicə edilmiş, onlar eynəklə təmin olunmuşlar. Bu proseslərdə Bakıya gedib-gəlmək, qalmaq,...bütün xərclər təşkilatın hesabına idi.
Dünya tarixi təcrübəsi göstərir ki, dövlətlə vətəndaş cəmiyətinin münasibətlərində heç vaxt tam harmoniya olmamışdır. Yalnız hakimiyyətlə vətəndaş arasında qarşılıqlı hörmət, işgüzar qarşılıqlı fəaliyyət və əməkdaşlıq əsasında informasiya cəmiyyətinə doğru uğurlu hərəkət mümkündür. Uzun sürən bu tarixi yolda respublikamız qətiyyətli addımlarını atır. Biz bu addımların uğuruna, xoşbəxt gələcəyimizə inanırıq! Çünki bizim ömrünü xalqına həsr etmiş, dünya şöhrətli, Müsəlman aləminin qüruru, Türk dünyasının böyük oğlu,... olan Prezidentimiz olub! Çünki Ulu öndərin Yeni Azərbaycan arzularını həyata keçirən, dünya dövlətləri arasında öz imzası olan müstəqil Azərbaycanımızın daim qüdrətlənməsinə təminat yaradan,... layiqli davamçısı var! Həm də bu torpağın işgüzar, bacarıqlı, vətənpərvər, qədirbilən, zəhmətsevər,... övladları var! Bu yolda əməyini, biliyini əsirgəməyənləri Allah qorusun! Ulu Tanrı hamımızın yardımçısı olsun!