Press-reliz: “Elektron məktəb” layihəsi çərçivəsində məktəblərə kommunikasiyaları daha effektiv şəkildə qurmağa imkan verən videozəng funksiyası tətbiq olunur. Bu haqda Azərbacan Təhsil Şəbəkəsinin (AzEduNet) rəhbəri Səməd Abbasov bəyan etdi. “Elektron məktəb” layihəsi “2008-2012-ci illərdə təhsil sisteminin informasiyalaşdırılması üzrə Dövlət Proqramı” çərçivəsində Bakı, Sumqayıt və digər şəhərlərin 30 məktəbində reallaşdırılır. Sözügedən layihə çərçivəsində AzEduNet ən qabaqcıl Cisco texnologiyalarını tətbiq edir. Məktəblər şəbəkəyə fiber-optik kabel ilə qoşulur. Məktəblərdə Cisco avadanlığı və videozəngli İP-telefoniya sistemi quraşdırılır. Onun sözlərinə görə, əvvəl şəxsi kommunikasiyalar üçün nəzərdə tutulmuş videozəng funksiyasını bir çox müəllimlər məktəblər arası videokonfransların təşkili üçün istifadə edirlər. Ona görə də müəllimlərin videotexnologiyalara olan marağını nəzərə alaraq AzEduNet bu il tədris prosesində keyfiyyətli videonun (SD/HD/FullHD) geniş şəkildə istifadəsi üçün şərait yaradacaq videotexnologiyaların pilot tətbiqini planlaşdırır. AzEduNet şəbəkəsi vasitəsilə çoxnöqtəli videokonfransların, interaktiv videokommunikasiyaların və s. keçirilməsi mümkün olacaq. “Şəbəkə və videotexnologiyaların yardımılə biliklərin ötürülməsini daha da effektiv şəkildə təşkil etmək olar. Təsəvvür edin, Azərbaycanda və xaricdə nə qədər qabaqcıl müəllim bütün ölkə üzrə böyük sayda dinləyici kütləsi üçün eyni anda mühazirə keçirə bilər. Of-layn izləmə üçün yazılmış və şəbəkədə yerləşdirilmiş həmin mühazirələrin yazısını nə qədər insanın izləyə biləcəyini təsəvvür edin. Azərbaycan Təhsil Şəbəkəsinin və tərəfimizdən tətbiq olunan videotexnologiyaların yardımılə bu tezliklə mümkün olacaq”, deyə Səməd Abbasov qeyd etdi.
|