Gün.Az
Zaqatala məktəbliləri Moskvalı həmkarları ilə bilik yarışına qoşulub

01 Oktyabr [16:51] Zaqatala məktəbliləri Rusiyanın paytaxtı Moskvada təşkil olunan "Eruditı planeti” internet bilik müsabiqəsinə qoşulub.
Bu barədə Gün.Az-ın bölgə müxbirinə layihənin rəhbəri Bahar İsmayılova məlumat verib.

Bildirilir ki, ötən ilin may ayından internet bilik yarışmasına qoşulmaq təklifi alsalar da ilkin hazırlıq olmadığından layihəyə qoşulmayıblar. Lakin ötən yay tətili günlərini boşa verməyən bir qrup məktəbli Moskvadan göndərilən suallar və tapşırıqları, məntiqi misalları birgə müzakirə edərək növbəti müsabiqəyə hazırlaşıblar.

Bir neçə dəfə Zaqatala Tədris Mərkəzinin köməyi ilə məktəblilər arasında onlayn konfranslar keçirilib, müzakirələr aparılıb. Nəhayət, bu il zaqatalalılar bir neçə müəllim, ibtidai sinif, orta pillə, yuxarı sinif şagirdləri və tələbə gənclərdən ibarət 4 qrupla müsabiqəyə qoşulub.

Bahar İsmayılovanın sözlərinə görə şagirdlərin intellektual hazırlığı sayəsində yarışmanın final mərhələsinə vəsiqə əldə etmələri ilk addım kimi yüksək nəticədir. Çünki bilik yarışmasına qoşulan bir çox ölkələrin məktəbliləri bu mərhələni adlaya bilməyib.

Qeyd edək ki, iştirakçılar qazandıqları nəticəyə uyğun olaraq internet-bilik yarışmasını təşkil edən təşkilatın diplom və sertifikatlarıyla mükafatlandırılacaq.

R.Abdulov
Gün.Az