"ƏTRAF MÜHİTİ QORUYAQ!" mövzusunda
Zaqatala məktəblilərinin rayon əhalisinə MÜRACİƏTİ
Müasir dövrdə bizim həyat tərzimiz gələcəyimizi təhlükə altında qoyur. Bununla belə, güman edilir ki, vəziyyəti yaxşılığa doğru dəyişmək mümkündür. Bu isə yalnız davamlı inkişaf prinsiplərinə riayət etdiyimiz halda mümkün ola bilər. Davamlı inkişafın əsas mahiyyəti gələcək nəsillərin öz tələbatlarını təmin etmək imkanını təhlükə altında qoymadan indiki nəslin tələbatının ödənilməsindən ibarətdir. Müxtəlif səbəblərə görə havanın, suyun, torpağın çirklənməsi, ildən-ilə Yer üzündə məskunlaşan bitki və heyvan növlərinin sayının getdikcə azalması hər birimizi narahat etməlidir. Bəzi proqnozlara görə planetdə hər gün bir növ itirilir. Dünya ölkələrini narahat edən ciddi ekoloji problemlərin həllinə kömək etmək üçün olduğumuz yerdən, tutduğumuz mövqedən, yaşımızın çoxluğundan-azlığından asılı olmayaraq hərəmiz bir damla da olsa töhfə verməyə çalışmalı, bacardığımız hər bir işi görməliyik. Havanı, suyu, torpağı bəzi gündəlik fəaliyyətimizlə çirkləndirməklə həm özümüzə, ətrafımıza, həm də Ana Təbiətə zərər vermiş oluruq. Planetimizdə mövcud olan hər bir canlının yaşamaq hüqüqu vardır. Gəlin bu hüququ onların əlindən almayaq! Bu gün nəinki insanların taleyi, eyni zamanda dünya miqyasında, həm də yaşadığımız rayonun ərazisində təsadüf edilən hər bir çiçəyin, hər bir böcəyin taleyi bizi düşündürməlidir. Biz insanlar qayğıkeş, humanist münasibətimizi Təbiətdən əsirgəməməliyik!
| 
