|
Informasiyan formatı anlayışı.
İstənilən növdən olan informasiyanin rəqəmli şəkildə təsviri və baytlarla kodlaşdırılması ideyası çox rasionaldır, məqsədəuyğundur, əlverişlidir.
0- dan 255- ə qədər qiymətlər alan baytlar ardıcıllığı şəklində təsvir olunan informasiyalarla işləmək kompüter üçün çox münasibdir. Bildiyimiz kimi, bu informasiya mətn, şəkil, videoflim, musiqi və s. ola bilər. Musiqi də, şəkil də,... 0 və 1 – lər ardıcıllığı şəklində göstərilirsə, bəs kompüter necə təyin edir ki, bu 0 və 1 - lərin təsvir etdiyi informasiya mətndir, şəkildir, yoxsa musiqidir?
Məsələn, 70, 79, 82, 77, 65, 84 kimi bir neçə baytı gözdən keçirək.
Burada nə yazılmışdır?
Ola bilər ki, bu baytlarla iki rəngli nöqtə təsvir olunmuşdur:
birincisində 70, 79, 82, nömrəli, ikincisində 77, 65, 84 nömrəli rənglərdən istifadə olunmuşdur.
Ola bilər ki, burada parlaqlığına, tündlüyünə görə fərqlənən altı ədəd boz rəngli nöqtə təsvir edilmişdir
Ola bilər ki, hər hansı melodiyanın başlanğıcı və s. təsvir edilmişdir.
Əgər kompüter baytlar ardıcılllığının nəyi təsvir etdiyini bilməsə, bu baytlarla heç bir iş görə bilməz. Kompüter bilməlidir ki, baytlarla kodlaşdırılan informasiyanın hansı hissəsi mətni, hansı hissəsi musiqini və yaxud şəkli təsvir edir. Bu problemin həlli başlıqla əlaqəlidir. Əgər baytlar qrupunun qarşısında xüsusi başlıq olarsa, kompüter dəqiq ayırd edəcək ki, bu baytlar hansı informasiyanı təsvir edir. Kompüterin, başlığı təsvir edən baytların harada qurtardığı və verilənlərin təsvir edən baytlar ardıcıllığının haradan başlandığını bilməsi üçün başlıq və verilənlər ciddi qaydada təyin edilmiş formata malik olmalıdır. İnformasiyanın müxtəlif növləri üçün müxtəlif formatlardan istifadə edilir. Məsələn, əgər bu ağ-qara şəkildirsə, başlıqdan sonra gələn hər bayt nöqtənin parlaqlığını təyin edir. Əgər bu rəngli şəkildirsə, onda hər hansı nöqtənin rəngi bir baytla deyil, bir neçə baytla təsvir edilir.
Mənbə: http://"KOMPÜTER ALƏMİ" | 
