Texnoloji bacarığı olan müəllimlər mükafatlandırıldı
Təhsil Nazirliyinin müəllimlər, şagirdlər və tələbələr arasında keçirdiyi "Elektron təhsil” respublika müsabiqəsinin nəticələri açıqlandı
Bu gün Təhsil Nazirliyi "Elektron təhsil” respublika müsabiqəsinin qaliblərini mükafatlandırıb. Təhsil sahəsində keçirilən ən genişmiqyaslı müsabiqənin nəticələrinə həsr olunan mərasimdə Bakıda və regionlarda fəaliyyət göstərən məktəblərin direktorları, şagirdləri, ali məktəb tələbələri iştirak edib.
Mərasimdə təhsil naziri Misir Mərdanov da iştirak edib. Nazir bildirib ki, "2008-2012-ci illərdə təhsil sisteminin informasiyalaşdırılması Dövlət Proqramı” çərçivəsində təşkil olunan müsabiqədə 1400-dən artıq iddiası qeydiyyatdan keçib. Onlardan 810 layihə seçilərək Təhsil Nazirliyi tərəfindən formalaşdırılan Münsiflər Heyətinə təqdim olunub. Nazir deyib ki, həmin 810 layihədən 89 müxtəlif nominasiyalar üzrə qalib seçilib.
Misir Mərdanov onu da bildirib ki, iki mərhələdə keçirilən müsabiqəni "Microsoft Azərbaycan”, "İntel”, HP, "Azərfon-Vodafone”, "Mədəd” təşkilatları dəstəkləyir. Onun sözlərinə görə, müsabiqənin məqsədi elektron tədris resurslarından, İnternet texnologiyalarından tədris prosesində istifadəni populyarlaşdırmaq, informasiya texnologiyalarından fəal istifadə edən müəllimləri həvəsləndirməkdir: "Çox sevindirici haldır ki, bu müsabiqəyə qatılanlar arasında regionlardakı məktəblərdə çalışan müəllimlər də var. Hətta qaliblərin bir neçəsi də region məktəblərini təmsil edir. Müsabiqədə iştirak edənlərin 850 nəfəri Bakı, 125-i Sumqayıt, 500 nəfəri isə region məktəblərini təmsil ediblər. Bu müsabiqədə regionlar arasında Quba, Gəncə, Qazax, Zaqatala məktəblərinin müəllimləri daha fəallıq göstəriblər”.
Müsabiqədə beş nominasiyanın hər biri üzrə qalib gələnlərə noutbukılar və digər xüsusi mükafatlar təqdim edilib.

 

 

 
Elxan SALAHOV
FOTOreportajı hazırladı: Rüstəm İsmayılov